شويه هندسه

************************
دروس التصميم الانشائي
تصميم قواعد منفصله
تصميم ونمذجة اعمدة
برنامج فك باسورد اى ملف اكسل
اضغط للتحميل
************************
انا قولت انزل شويه حاجات هندسيه
الواحد برده مش هيقدر ينسى اصله
مع انها مهنه ليها سبع عيوب
1- تجيب الضغط و السكر على المدى المتوسط و احيانا يتبقى زبون دائم فى المصحات النفسيه و العصبيه
2- مهنه ناشفه قوى عمال و صنايعيه و مقاولين و طوب ورمل و زلط مفيش فيها اى حاجه طريه خاص
3-مهنة من لا مهنه له - بمعنى ان كل من هب ودب بيفتى فى الخرسانات و التسليح -مع انه ممكن يكون بنى ادم غبى و بياكل برسيم و الالعن من كده انك ممكن تلاقيه من كتر اكل البرسيم خلاص قرب يخضر (يبقى اخضر)
4- مهنه تشجع بصوره او بأخرى على الطلاق
ليه ؟؟
علشان بيطلع عينك فى الشغل و بتبقى خلاص هتطلع من هدومك
و ترجع البيت تلاقى الست هانم بتقولك انت جيت ؟؟!!!!
سؤال غبى طبعا فترد عليه
لا انا لسه مجتش هو البعيد اعمى ولا بيتغابى
او الصبح و انت صاحى بدرى مش شايف متر قدامك
تسألك انت رايح الشغل ؟؟!!!!
ترد عليها لا رايح اصيف متعرفيش المايوه بتاعى فين ؟!!!!
حاجه تحرق الدم
طبعا الحوار هيتطور و يوصل لمعركه من الاسلحه المشتركه (شباشب - جزم - ايد المقشه -...... الخ)
5- المهنه بتبهت على صاحبها فمثلا ممكن تعمل مقايسه للفطار بتاع بكره و تعمل حصر للكميات
ومش بعيد كمان انك تنزل كراسه شروط و مواصفات
ومش بعيد تنشرها مناقصه او ممارسه او ممكن تسندها بالامر الماشر للمدام(ده لو لسه على ذمتك)
6-المهنه دى مهنه التشرد النهارده فى القاهره بعد شهر فى الوادى الجديد بعد شهرين بتبنى موقف اتوبيس فى وسط الصحرا مثلا اى اشتغاله تتبعت فيها وخلاص مفيش استقرار
7-بتتعامل مع خلاصه اغبياء الكوكب اللى ميعرفوش الفرق بين الميه و الجاز
و طبعا من عاشر القوم اربعين يوم بقى منهم فتلاقيهم غصب عنك بهتو عليك و تبدا تتوحم على البرسيم
وهناك المزيد و المزيد
بس مازلت احبها و سأظل احبها للأبد (المهنه)
علشان محدش يفهم حاجه كده ولا كده للاسف مفيش وهو ده العيب الثامن

كان معكم مهندس جعان